Recenzoj kaj komentoj

Tiu ĉi romano fariĝas pli kaj pli bona kaj plezuriga laŭ ĉiu finlegita ĉapitro. Komence mi taksis la enajn monologojn de la ĉefprotagonisto iel tedaj, ĝene naivaj, kontraste malverŝajnaj al la historia epoko, sed laŭ la progreso de la intrigo mi tre ŝatas, kiel la antaŭaj pensoj kaj spertoj plene klarigas la postajn agojn. Des pli, ke la romiaj tempoj tute ne estas mia intereskampo, kio ĉiam iel staras kiel obstaklo inter mi kaj la “Löwensteinalo” (se uzi Piĉ-an vorton).

La romanon “Heart of Darkness” mi legis dufoje en la originala angla versio, sed mi neniam vere ŝatis ĝin. Ĉi-foje mi provas ĝin en kuraĝa traduko, kiun la tradukinto mem ne nomas traduko, sed poligo – eble la stilon de Jacek Dukaj mi ŝatos pli.

Post la lasta epizodo de "Usone persone" mi sentis la neceson reveni al tiu ĉi moderna klasikaĵo.

Certe unu el la plej malbonaj (literature) libroj, kiujn mi legis en mia vivo. Mi bezonas iom da ripozo por povi digesti ĝin. Vaŭ.

Post pli ol monato sen legado (pro novaj cirkonstancoj de mia profesia vivo) mi finfine sukcesis komenci ion novan. Tiu ĉi libro estis en la unua pozicio de mia legolisto jam antaŭe, sed mi timas, ke ĝi eble estos tre malfacila – kaj laŭ temo, kaj laŭ lingvaĵo.

Iu bonega podkasto rekomendis tiun libron.

Mi ne memoras, kiam laste mi legis tiel malbonan libron. Ĝi traktas la tre gravan temon de publika transporto kaj transporta ekskludo en Pollando. Pro la temo ĝi ricevas du stelojn de mim. Tamen mi sentas, ke la prezento estas tiel ĥaosa, ke ne eblas ekscii ion ajn utilan el la libro. Se mi antaŭe ne sciintus pri la afero el aliaj libroj (kaj ve, ekzistas pli bonaj libroj ĝuste pri tiu temo, kelkaj estas eĉ citataj en tiu ĉi), mi nenion lernus de tiu ĉi.

Sed nu, foje oni devas legi malbonan libron por poste kapabli aprezi la bonajn.

Hazarde trovita en biblioteko libro pri mastrumado – ĉefe pri mastrumado de homoj. Kvankam mi neniam emis engaĝiĝi en mastrumadon en la komerca kadro, mi pensas, ke la libro bele priskribas la defiojn tiel, ke ankaŭ la mastrumatoj povas profiti el ĝi. La aŭtoroj, tute malsimilaj al mi laŭ sperto kaj aĝo, prezentas tre homan aliron al mastrumado kaj montras, kiel kelko da funkciantaj mitoj povas malbonfartigi entreprenojn kaj organizaĵojn.

Kurioza libreto, kiu eble meritas reverkon au kompletigon, char kvankam satiraj prozajhoj ne mankas en Esperantujo, mi certe volonte legus novatestamentecan aldonajhon pri la naudek jaroj, kiuj pasis ekde la eldono de la "malnova testamento".

Tre interesa legaĵo pri la historio kaj nuntempo de la pola “drag”: reĝinjoj, reĝiĉjoj kaj ne nur. Foje malĝojiga, ĉar ĝi priskribas la realecon, kiu min mem koncernas persone, sed tre valora kaj samtempe varia.